కాకినాడ జిల్లా తాళ్లరేవు మండలం పి.మల్లవరం గ్రామంలో ప్రకృతి వ్యవసాయాన్ని అనుసరిస్తూ స్థానిక రైతులు ధూళిపూడి వెంకటరమణ (బాబి), దడాల సత్తికొండ ఆధ్వర్యంలో గోవు ఆధారిత పద్ధతుల ద్వారా RNR 15048 రకం ధాన్యం పంటను సాగు చేశారు. ఈ పంటపై ధాన్యం కోత ప్రయోగాన్ని వ్యవసాయ శాఖ విఒ అజయ్ నిర్వహించారు. 5×5 మీటర్ల విస్తీర్ణంలో కోత నిర్వహించి, దిగుబడి పరంగా ఎకరానికి 24 బస్తాలు వచ్చినట్లు ధృవీకరించారు.
ఈ ప్రకృతి వ్యవసాయ విధానంలో ఎటువంటి రసాయనాలను ఉపయోగించకుండా, గోమూత్రం, జీవామృతం వంటి సంప్రదాయ ఉత్పత్తులను వినియోగించడం జరిగింది. దీనివల్ల నేల ఫలద్రవ్యత పెరగడమే కాకుండా, దిగుబడిలోనూ మంచి ఫలితాలు వచ్చాయి. ఈ ప్రయత్నం స్థానికంగా ప్రకృతి వ్యవసాయంపై విశ్వాసాన్ని పెంచింది.
ఈ సందర్భంగా రైతు ధూళిపూడి వెంకటరమణ మాట్లాడుతూ, ప్రతి రైతు తన ఇంటికి సరిపడేంతైనా తొలకరి పంటను దేశవాళీ విత్తనాలతో సాగుచేయాలని సూచించారు. ఇలా చేస్తే స్థానిక విత్తనాల పరిరక్షణ జరుగుతుందనే విషయాన్ని హైలైట్ చేశారు. అవసరమయ్యే సాంకేతిక సహాయం, విత్తనాల లభ్యత విషయాల్లో తాము పూర్తిగా తోడ్పాటునిస్తామని చెప్పారు.
ఈ కార్యక్రమంలో యంటి ధనలక్ష్మి, సతీష్, వెంకటలక్ష్మి, నేహ, సత్యవాణి, తులసి, భవానీ, అరుణ, ఆనాల పాపారావు, నేతల నాగార్జున, కుడిపూడి కృష్ణ, వనిమిశెట్టి బాబు, అనూహ్జి తదితరులు పాల్గొన్నారు. ఈ ప్రయత్నం ద్వారా గ్రామంలోని రైతుల్లో ప్రకృతి వ్యవసాయం పట్ల ఆసక్తి మరింతగా పెరిగే అవకాశాలు కనిపిస్తున్నాయి.
