Kollywood | ‘జైలర్ 2’ వర్సెస్ ‘ధనుష్ 55’.. అభిమానుల్లో పెరుగుతున్న ఉత్కంఠ

Kollywood: పండుగ సీజన్లు వచ్చాయంటే స్టార్ హీరోల సినిమాల మధ్య పోటీ వాతావరణం నెలకొనడం సహజంగా మారింది. దీపావళి వేళ కోలీవుడ్‌లో ఇద్దరు స్టార్ హీరోల మధ్య ఆసక్తికరమైన బాక్సాఫీస్ పోరు చూడొచ్చని సినీ వర్గాలు భావిస్తున్నాయి. తమిళ సినీ పరిశ్రమలో ఒకప్పటి మామ-అల్లుళ్లుగా ఉన్న సూపర్ స్టార్ రజనీకాంత్, నటుడు ధనుష్ సినిమాలు ఒకే సమయంలో ప్రేక్షకుల ముందుకు రానున్నాయనే వార్తలు సినీ వర్గాల్లో చర్చనీయాంశంగా మారాయి.

నెల్సన్ దిలీప్‌కుమార్ దర్శకత్వంలో తెరకెక్కిన ‘జైలర్’ చిత్రం భారీ విజయాన్ని అందుకున్న సంగతి తెలిసిందే. ఈ సినిమాకు కొనసాగింపుగా రూపొందుతున్న ‘జైలర్ 2’పై ఇప్పటికే భారీ అంచనాలు నెలకొన్నాయి. ప్రస్తుతం చిత్రీకరణ చివరి దశలో ఉండగా, పోస్ట్ ప్రొడక్షన్ పనులను పూర్తి చేసి దీపావళి కానుకగా విడుదల చేయాలని నిర్మాతలు ప్రణాళికలు సిద్ధం చేస్తున్నట్లు సమాచారం.

మరోవైపు జాతీయ అవార్డు గ్రహీత ధనుష్ నటిస్తున్న 55వ చిత్రం కూడా అదే సీజన్‌ను లక్ష్యంగా పెట్టుకున్నట్లు కోలీవుడ్ వర్గాలు చెబుతున్నాయి. ‘అమరన్’ దర్శకుడు రాజ్‌కుమార్ పెరియసామి తెరకెక్కిస్తున్న ఈ చిత్రం షూటింగ్ వేగంగా కొనసాగుతోంది. కంటెంట్‌కు ప్రాధాన్యత ఇచ్చే ధనుష్ సినిమాలకు ప్రత్యేక ఆదరణ ఉండటంతో ఈ ప్రాజెక్టుపై కూడా ఆసక్తి పెరుగుతోంది. ఒకవైపు ‘జైలర్ 2’కు ఉన్న భారీ బ్రాండ్ ఇమేజ్, మరోవైపు ధనుష్ నటనకు ఉన్న ప్రత్యేక గుర్తింపు.. ఈ రెండూ కలిపి దీపావళి బాక్సాఫీస్ రేసును మరింత ఆసక్తికరంగా మార్చాయి. చివరకు ప్రేక్షకుల మద్దతు ఎవరికి లభిస్తుందో, బాక్సాఫీస్ విజేతగా ఎవరు నిలుస్తారో చూడాల్సి ఉంది.