పోలీసులు మీకోసం కార్యక్రమంలో భాగంగా కొమురం భీం ఆసిఫాబాద్ జిల్లా పోలీసుల ఆధ్వర్యంలో ప్రతిమ హాస్పిటల్, కరీంనగర్ సహకారంతో జైనూర్ పోలీస్ స్టేషన్ సమీపంలోని మైదానంలో ఉచిత మెడికల్ క్యాంప్ నిర్వహించారు. ఈ కార్యక్రమానికి జిల్లా ఎస్పీ డివి శ్రీనివాసరావు ఐపిఎస్ ముఖ్య అతిథిగా హాజరై వైద్య సేవలను పరిశీలించారు.
ఈ సందర్భంగా ఎస్పీ మాట్లాడుతూ, పేదల వద్దకే వైద్యం అనే ఉద్దేశంతో ఈ వైద్య శిబిరాన్ని ఏర్పాటు చేసినట్లు తెలిపారు. ప్రజలకు నాణ్యమైన వైద్య సేవలు అందించేందుకు పోలీసులు కృషి చేస్తున్నారని అన్నారు. ఆరోగ్య సమస్యలు ఎదుర్కొంటున్న పేద ప్రజలకు ఉచితంగా వైద్య పరీక్షలు నిర్వహించడం ద్వారా వారికి మెరుగైన చికిత్స అందించాలనే లక్ష్యంతో ఈ క్యాంప్‌ను ఏర్పాటు చేశామని వివరించారు.
క్యాంప్‌లో 300 మందికి వైద్య పరీక్షలు నిర్వహించారు. ఇందులో ఈసీజీ, 2డీ ఎకో, అల్ట్రాసౌండ్ స్కానింగ్, ఇతర రక్త పరీక్షలు చేశారు. పలు ఆరోగ్య సమస్యలను గుర్తించి అవసరమైన మందులు అందజేశారు. గ్రామ ప్రజలు ఈ వైద్య శిబిరాన్ని సమర్థంగా ఉపయోగించుకున్నారు.
ఈ కార్యక్రమంలో వైద్య బృందంతో పాటు స్థానిక పోలీసులు, గ్రామ ప్రజలు, వివిధ సంఘాల ప్రతినిధులు పాల్గొన్నారు. భవిష్యత్తులో మరిన్ని ఉచిత వైద్య శిబిరాలను ఏర్పాటు చేయాలని జిల్లా ఎస్పీ తెలిపారు. పోలీసుల సామాజిక సేవా కార్యక్రమాలను ప్రజలు ప్రశంసించారు.
