వక్ఫ్ బోర్డు బిల్లుపై దేశవ్యాప్తంగా వివాదం చెలరేగింది. అధికార, విపక్షాల మధ్య తీవ్ర వాదోపవాదాల మధ్య ఈ బిల్లు ఉభయ సభల ఆమోదం పొందింది. అయితే ఈ బిల్లు తాలూకు రాజకీయ ప్రభావాలు నితీశ్ కుమార్ నేతృత్వంలోని జేడీయూలో కూడా కనిపించాయి. పార్టీ బిల్లుకు మద్దతు తెలిపిన నేపథ్యంలో ఇద్దరు కీలక నేతలు తమ పదవులకు రాజీనామా చేశారు.
జేడీయూ సీనియర్ నేత మొహమ్మద్ ఖాసిం అన్సారీ, మైనార్టీ వింగ్ అధ్యక్షుడు మొహమ్మద్ అష్రఫ్ అన్సారీ లు పార్టీని వీడుతూ తీవ్ర వ్యాఖ్యలు చేశారు. వక్ఫ్ బిల్లుకు మద్దతు ఇవ్వడం తమ సిద్ధాంతాలకు విరుద్ధంగా ఉందని ఖాసిం అన్సారీ పేర్కొన్నారు. తన రాజకీయ జీవితాన్ని పూర్తిగా జేడీయూకే అంకితమిచ్చిన తాను, ఈరోజు తీవ్ర నిరాశకు గురవుతున్నట్లు వెల్లడించారు.
నితీశ్ కుమార్‌పై ముస్లింలకు ఉన్న నమ్మకాన్ని ఈ బిల్లు ముక్కలయ్యేలా చేసిందని అన్నారు. జేడీయూ నిర్ణయం ముస్లిం సామాజిక వర్గాన్ని తీవ్రంగా కలచివేస్తోందని తెలిపారు. ఈ బిల్లు ముస్లింల హక్కులను హరించేందుకు గల ఉద్దేశంతో తీసుకువచ్చినదిగా పేర్కొన్నారు. జేడీయూ సెక్యులర్ ధోరణి నుంచి వదిలిపెట్టినట్లు కనిపిస్తోందని వ్యాఖ్యానించారు.
బిల్లు రాజ్యాంగ పరమైన హక్కులకు, మత స్వేచ్ఛకు వ్యతిరేకంగా ఉందని ఖాసిం అన్సారీ తెలిపారు. ముస్లింల హక్కులను హరించేలా ప్రభుత్వం వ్యవహరిస్తోందని ఆరోపించారు. జేడీయూకు తాను చేసిన సేవలు వృథా అయ్యాయన్న భావన కలుగుతోందని, ఇకపై పార్టీతో సంబంధం లేకుండా ముందుకు సాగుతానని స్పష్టం చేశారు.
