భారత క్రికెట్ దిగ్గజం సచిన్ టెండూల్కర్ ఇటీవల అసోం రాష్ట్రాన్ని సందర్శించారు. ఈ సందర్భంగా ప్రపంచ ప్రఖ్యాతి గాంచిన కజిరంగా నేషనల్ పార్క్‌లో సందడి చేశారు. ప్రకృతి అందాలను ఆస్వాదిస్తూ జీప్ సఫారీ చేశారు. ఇది ఆయనకు విశేష అనుభవాన్ని ఇచ్చింది.
సచిన్ పార్క్‌లోని జంతువులను దగ్గరగా చూసి ముచ్చటపడ్డారు. ముఖ్యంగా అక్కడి ఏనుగులకు స్వయంగా ఆహారం అందించారు. ప్రకృతికి దగ్గరగా ఉండటం ఎంతో ఆనందంగా ఉందని అభిప్రాయపడ్డారు. ప్రకృతి ప్రేమికుడిగా తన భావాలను పంచుకున్నారు.
సచిన్ కజిరంగా పార్క్‌కి వచ్చిన వార్త తెలియగానే, వేలాది మంది అభిమానులు అక్కడికి తరలివచ్చారు. చిన్నప్పటి నుంచి సచిన్‌ను ఆదర్శంగా చూసే అభిమానులు, లిటిల్ మాస్టర్‌ను ఒకసారి చూడాలనే ఉత్సాహంతో ఎగబడ్డారు. ఆయనతో సెల్ఫీలు తీసుకోవడం కోసం క్యూ కట్టారు.
ప్రస్తుతం సచిన్ జీప్ సఫారీ చేస్తున్న వీడియోలు సోషల్ మీడియాలో తెగ వైరల్ అవుతున్నాయి. అందులో ఆయన హాయిగా ప్రయాణిస్తున్న దృశ్యాలు, ఏనుగులకు ఆహారం ఇస్తున్న క్షణాలు మనసులను తాకుతున్నాయి. కజిరంగా సందర్శనలో సచిన్ చూపించిన సరదా మూడ్ అభిమానులకు ఆనందాన్ని ఇచ్చింది.
