తెలుగు సంగీత చరిత్రలో చిరస్మరణీయంగా నిలిచిన ఘంటసాల గారి గానం ఎంతో మంది హృదయాలను హత్తుకుంది. అటువంటి గొప్ప గాయనుడి జీవితాన్ని silver screenపై చూపించాలని భావించి ‘ఘంటసాల ది గ్రేట్’ అనే సినిమాను రూపొందించారు సీహెచ్ రామారావు. పోలీస్ డిపార్ట్‌మెంట్‌లో పనిచేసిన ఆయన, ఘంటసాల గారి పట్ల గల అభిమానం వల్లే ఈ ప్రయత్నం చేశారు.
ఇటీవలి కాలంలో ‘సుమన్ టీవీ’కి ఇచ్చిన ఇంటర్వ్యూలో రామారావు మాట్లాడుతూ, ఈ సినిమా తీయడంలో ఎదురైన సవాళ్లు వివరించారు. “ఘంటసాల గారి కుమారుడు రత్నకుమార్ గారి అనుమతి లిఖిత పూర్వకంగా తీసుకున్నాను. కానీ సినిమా టీజర్ విడుదల సమయంలో అర్ధరాత్రి కోర్టుకు వెళ్లి సినిమాను ఆపేశారు. దీంతో సినిమా విడుదలలో అనేక ఆటంకాలు వచ్చాయి,” అని ఆయన తెలిపారు.
“ఘంటసాల గారి పాటలకంటే ఆయన వ్యక్తిత్వమే గొప్పది. అదే తరాల వరకు నిలవాలి అనే సంకల్పంతో సినిమాను తీశాను. మేం దాదాపు రెండు కోట్లు పెట్టాం. అనుమతుల్లో స్పష్టత లేకపోవడం వల్ల ఎంతో ఇబ్బంది పడాల్సి వచ్చింది,” అంటూ ఆయన ఆవేదన వ్యక్తం చేశారు.
రత్నకుమార్ గారి మరణానంతరం కుటుంబ సభ్యులు సినిమాను చూసి మెచ్చుకుని అనుమతి ఇచ్చారు. అయినప్పటికీ సినిమా పూర్తిస్థాయిలో విడుదల కాకపోవడంతో రామారావు తీవ్ర నిరాశకు లోనయ్యారు. ప్రస్తుతం దశలవారీగా ఈ సినిమాను విడుదల చేస్తున్నా, అది అందరికీ చేరడం లేదని, ఘంటసాల గారి గొప్పతనాన్ని అందరికీ తెలియజెప్పాలనే ఆశ నెరవేరలేదని వాపోయారు.
