హైదరాబాద్ జీడిమెట్ల పారిశ్రామిక వాడ పరిధిలోని దూలపల్లిలో భారీ అగ్ని ప్రమాదం జరిగింది. రిషిక కెమికల్స్ గౌడౌన్‌లో ఒక్కసారిగా మంటలు చెలరేగాయి. గౌడౌన్‌లో నిల్వ ఉంచిన రసాయన పదార్థాలు మంటలు ఎక్కువయ్యేలా చేశాయి.
దట్టమైన పొగలు ప్రాంతమంతా వ్యాపించడంతో స్థానికులు భయంతో ఇళ్ల నుంచి బయటకు పరుగులు తీశారు. భారీ మంటల కారణంగా పరిసర ప్రాంతాల్లో గాలి నాణ్యత దెబ్బతింది. సమాచారం అందుకున్న అగ్నిమాపక సిబ్బంది సంఘటనా స్థలానికి చేరుకొని మంటలను ఆర్పేందుకు ప్రయత్నించారు.
అగ్నిమాపక యంత్రాలతో దాదాపు రెండు గంటల పాటు మంటలను నియంత్రించడానికి శ్రమించారు. ప్రాథమికంగా భారీ ఆస్తి నష్టం జరిగినట్టు గుర్తించారు. అయితే, ఎలాంటి ప్రాణ నష్టం జరగలేదు అని అధికారులు తెలిపారు.
ఈ ప్రమాదం దూలపల్లి ప్రాంతంలో భారీ ట్రాఫిక్ స్తంభనకు కారణమైంది. స్థానికుల పనులు, రాకపోకలు తీవ్రంగా దెబ్బతిన్నాయి. ప్రమాదానికి కారణాలు తెలుసుకోవడానికి అధికారులు దర్యాప్తు ప్రారంభించారు.
