ఖమ్మం జిల్లా పెనుబల్లి మండలం బ్రహ్మలకుంట గ్రామ పరిధిలో చిరుతపులి సంచరిస్తున్నట్లు గ్రామస్తులు గుర్తించి అటవీశాఖ అధికారులకు సమాచారం అందించారు. చిరుతపులి పాదముద్రలను పరిశీలించిన అధికారులు ఇది నిజమైన చిరుతపులి ఆనవాళ్లు అని నిర్ధారించారు. ఈ సమాచారం తెలియగానే గ్రామ ప్రజల్లో భయం నెలకొంది.
అటవీశాఖ అధికారులు వెంటనే స్పందించి బ్రహ్మలకుంట పరిసర ప్రాంతాల్లో మైక్ ప్రచారం నిర్వహించారు. ప్రజలు అప్రమత్తంగా ఉండాలని, ముఖ్యంగా రాత్రి సమయంలో ఒంటరిగా బయటికి వెళ్లొద్దని హెచ్చరించారు. వ్యవసాయ పనుల కోసం వెళ్లేవారు గుంపులుగా వెళ్లాలని సూచించారు.
చిరుతపులి సంచారం కారణంగా భద్రతా చర్యలు తీసుకోవాల్సిన అవసరం ఉందని అధికారులు తెలిపారు. అనుమానాస్పదమైన కదలికలు గమనించిన వెంటనే అటవీశాఖ అధికారులకు సమాచారం అందించాలన్నారు. చిరుతపులిని అటవీప్రాంతానికి పంపే చర్యలు తీసుకుంటామని పేర్కొన్నారు.
అటవీశాఖ అధికారులు వన్యప్రాణులకు హాని కలిగించకుండా తగిన జాగ్రత్తలు తీసుకోవాలని ప్రజలకు సూచించారు. గ్రామ ప్రజలు అవసరమైన ముందస్తు చర్యలు తీసుకుని అప్రమత్తంగా ఉండాలని, చిరుతపులిని చూసిన వెంటనే అధికారులకు తెలియజేయాలని విజ్ఞప్తి చేశారు.
