ప్రపంచ మార్కెట్ల నుంచి మిశ్రమ సంకేతాలు వచ్చినప్పటికీ, భారత స్టాక్ మార్కెట్లు ఈరోజు ట్రేడింగ్‌ను భారీ లాభాలతో ప్రారంభించాయి. ముఖ్యంగా ఐటీ రంగం షేర్లలో వెల్లువెత్తిన కొనుగోళ్లు మార్కెట్‌కు బలాన్నిచ్చాయి. భారత్, అమెరికా మధ్య వాణిజ్య ఒప్పందం త్వరలో కుదరవచ్చన్న సానుకూల అంచనాలు మదుపరుల విశ్వాసాన్ని మరింత పెంచాయి.
ట్రేడింగ్ ప్రారంభంలో బీఎస్ఈ సెన్సెక్స్ 727.81 పాయింట్లు పెరిగి 85,154.15 వద్దకు చేరుకోగా, ఎన్ఎస్ఈ నిఫ్టీ 188.6 పాయింట్లు లాభపడి కీలకమైన 26,000 మార్కును అధిగమించి 26,057.20 వద్ద ట్రేడింగ్ కొనసాగిస్తోంది. మార్కెట్ నిపుణుల అంచనా ప్రకారం, నిఫ్టీకి తక్షణ లక్ష్యం 26,186 వద్ద ఉండగా, ఆశావాహ దృక్పథంతో 26,800 స్థాయికి చేరుకునే అవకాశం ఉందని పేర్కొన్నారు. అయితే, 25,780 వద్ద మద్దతు ఉందని, మార్కెట్ ఒక్కసారిగా పడిపోనని వారు అభిప్రాయపడ్డారు.
రంగాలవారీగా చూస్తే, నిఫ్టీ ఐటీ ఇండెక్స్ 1.84 శాతం లాభంతో టాప్ గెయినర్‌గా నిలిచింది. ఇన్ఫోసిస్, హెచ్‌సీఎల్‌టెక్, టెక్ మహీంద్రా వంటి ఐటీ దిగ్గజాల షేర్లలో బలమైన కొనుగోళ్లు చోటుచేసుకున్నాయి. అయితే, నిఫ్టీ రియల్టీ సూచీ స్వల్పంగా 0.08 శాతం నష్టపోయింది. బజాజ్ ఫిన్‌సర్వ్, మారుతీ, పవర్ గ్రిడ్ షేర్లు నష్టాల్లో పయనించాయి.
ప్రధాన సూచీలతో పాటు స్మాల్‌క్యాప్, మిడ్‌క్యాప్ ఇండెక్సులు కూడా లాభాల్లోనే ఉన్నాయి. నిఫ్టీ స్మాల్‌క్యాప్ 100 ఇండెక్స్ 0.33 శాతం, నిఫ్టీ మిడ్‌క్యాప్ 100 ఇండెక్స్ 0.44 శాతం మేర పెరిగాయి. ఇదిలా ఉండగా, విదేశీ సంస్థాగత ఇన్వెస్టర్లు (ఎఫ్‌ఐఐలు) అక్టోబర్ 21న వరుసగా ఐదో రోజు కొనుగోళ్లు కొనసాగించారు. రూ. 96 కోట్ల విలువైన ఈక్విటీల కొనుగోలు మార్కెట్ సెంటిమెంట్‌ను మరింత బలపరిచింది.
