చైనా రైల్వే రంగంలో మరో ఘనతను సాధించింది. ప్రపంచంలోనే అత్యంత వేగవంతమైన హై-స్పీడ్ రైలు CR450ని ఆవిష్కరించి రికార్డు సృష్టించింది. ఇటీవల ట్రయల్ రన్స్‌లో ఈ రైలు గంటకు 453 కిలోమీటర్ల (281 మైళ్లు) వేగాన్ని అందుకుని కొత్త మైలురాయిని క్రీతించింది. ప్రీ-సర్వీస్ టెస్టింగ్ ప్రస్తుతం షాంఘై-చెంగ్డూ రైల్వే మార్గంలో జరుగుతోంది, దీని ద్వారా రైలు ప్రాక్టికల్ పరిస్థితులలో తన సామర్ధ్యాన్ని నిర్ధారిస్తోంది.
ప్రయాణికులకు సేవలకు అందుబాటులోకి వచ్చాక, ఈ రైలు గంటకు 400 కిలోమీటర్ల వేగంతో ప్రయాణిస్తుంది. ప్రస్తుతం చైనాలో నడుస్తున్న CR400 రైలు కేవలం 350 కిలోమీటర్ల వేగంతో నడుస్తుండగా, CR450 పాత మోడల్‌తో పోలిస్తే అత్యాధునిక టెక్నాలజీతో రూపొందించబడింది. ఈ రైలుకు బరువు 50 టన్నుల వరకు తగ్గించబడింది. అంతేకాక, గాలి నిరోధకతను 22% తగ్గించేందుకు ఏరోడైనమిక్ డిజైన్‌ను మెరుగుపరిచారు.
CR450 సున్నా నుంచి గంటకు 350 కిలోమీటర్ల వేగాన్ని కేవలం 4 నిమిషాల 40 సెకన్లలో చేరగలదు. అత్యంత వేగవంతమైన ప్రయోగాల్లో రెండు CR450 రైళ్లు ఎదురుగా ప్రయాణిస్తూ గంటకు 896 కిలోమీటర్ల సంయుక్త వేగాన్ని సాధించాయి, ఇది రైల్వే ఇంజినీరింగ్‌లో అరుదైన ఘనత.
ప్రయాణికులకు సేవలకు ప్రవేశపెట్టే ముందు, ఈ రైలు సుమారు ఆరు లక్షల కిలోమీటర్ల దూరంలో వివిధ పరీక్షలు పూర్తి చేస్తుంది. ఈ పరీక్షల తరువాత, CR450 ప్రయాణికులకు మరింత నిశ్శబ్దమైన, సౌకర్యవంతమైన మరియు పర్యావరణహితమైన ప్రయాణాన్ని అందించనుంది. రైలు వినియోగంలోకి వచ్చినప్పుడు, చైనా హై-స్పీడ్ రైల్వే ప్రపంచానికి కొత్త దిశను చూపుతుందని అధికారులు పేర్కొన్నారు.
