దేశీయ మొబైల్ బ్రాండ్‌ లావా మరోసారి భారత స్మార్ట్‌ఫోన్‌ మార్కెట్లో సంచలనం సృష్టించేందుకు సిద్ధమవుతోంది. 2024లో విడుదలైన ‘లావా షార్క్ 5జీ’ మోడల్‌కు కొనసాగింపుగా ఇప్పుడు కంపెనీ కొత్తగా ‘లావా షార్క్ 2’ పేరుతో అప్గ్రేడ్ వెర్షన్‌ను తెస్తోంది. లాంచ్‌ తేదీ, ధర వివరాలు ఇంకా వెల్లడించకపోయినా, కంపెనీ విడుదల చేసిన అధికారిక టీజర్లు, ఫీచర్ వివరాలు ఇప్పటికే వినియోగదారుల్లో పెద్ద ఎక్స్‌పెక్టేషన్‌ క్రియేట్‌ చేశాయి.
లావా షార్క్ 2లో 6.75 అంగుళాల హెచ్‌డీ+ డిస్‌ప్లేను అమర్చారు. గేమింగ్, వీడియో వీక్షణ అనుభూతిని మరింత స్మూత్‌గా మార్చేందుకు 120Hz రిఫ్రెష్ రేట్‌ సపోర్ట్‌ను అందించారు. గత మోడల్‌లో కేవలం 90Hz మాత్రమే ఉండగా, కొత్త షార్క్ 2లో దీన్ని అప్గ్రేడ్ చేయడం గేమింగ్ ప్రేమికులకు ప్రత్యేక ఆకర్షణగా నిలుస్తోంది. డిస్‌ప్లే మధ్యలో హోల్-పంచ్‌ కటౌట్‌తో సెల్ఫీ కెమెరా ప్లేస్‌మెంట్‌ ఇవ్వడం వల్ల ఇది ఆధునిక డిజైన్‌తో మరింత ఆకట్టుకుంటుంది.
డిజైన్‌ పరంగా లావా షార్క్ 2లో గ్లాసీ బ్యాక్‌ ఫినిష్‌ ఉన్న ఆకర్షణీయ లుక్‌ కనపడుతుంది. వెనుక భాగంలో ఎడమ మూలన చదరపు ఆకారంలో కెమెరా మాడ్యూల్‌ ఉండగా, ఇందులో 50 మెగాపిక్సెల్‌ ఏఐ ట్రిపుల్‌ రియర్‌ కెమెరా సెటప్‌ ఉంది. కంపెనీ ప్రకారం, ఇది తక్కువ లైట్‌లో కూడా క్వాలిటీ ఫోటోలు తీసేలా ఆప్టిమైజ్‌ చేయబడింది. ఈ మోడల్‌ బ్లాక్‌, సిల్వర్ రంగులలో అందుబాటులోకి రానుంది.
ఫోన్‌ బాడీ డిజైన్‌లో కుడివైపు పవర్‌, వాల్యూమ్‌ బటన్లు ఉండగా, ఎడమ వైపు సిమ్‌ ట్రే కోసం స్లాట్‌ ఇచ్చారు. కింద భాగంలో స్పీకర్‌ గ్రిల్‌, 3.5 ఎంఎం హెడ్‌ఫోన్‌ జాక్‌, యూఎస్‌బీ టైప్-సి పోర్ట్‌ అమర్చారు. మొత్తం లుక్‌ పరంగా చూస్తే, ఇది లావా బోల్డ్‌ ఎన్1 ప్రో మోడల్‌ను గుర్తు చేస్తుంది.
ఫోన్‌ యొక్క బ్యాటరీ కెపాసిటీ, ప్రాసెసర్‌, సాఫ్ట్‌వేర్‌ వెర్షన్‌ వంటి పూర్తి వివరాలు కంపెనీ ఇంకా వెల్లడించకపోయినా, లావా షార్క్ 2లో మధ్యస్థ బడ్జెట్‌ రేంజ్‌లో ఉన్న ప్రాసెసర్‌ ఉండే అవకాశం ఉందని టెక్‌ విశ్లేషకులు చెబుతున్నారు. లావా తరచూ 10,000 – 15,000 రూపాయల రేంజ్‌లో మోడళ్లను విడుదల చేసే క్రమంలో, ఈ ఫోన్‌ కూడా అదే సეგმెంట్‌లో లాంచ్‌ అయ్యే అవకాశం ఉంది.
భారతీయ మార్కెట్లో చైనా ఫోన్లకు ప్రత్యామ్నాయంగా లావా బ్రాండ్‌ ఇప్పటికే నమ్మకాన్ని సంపాదించుకుంది. షార్క్ 2తో ఆ స్థాయిని మరింత బలోపేతం చేసుకోవాలని కంపెనీ యోచిస్తోంది. మరి లావా ఈ కొత్త మోడల్‌ ధరను ఎంతగా ఫిక్స్‌ చేస్తుందో, మార్కెట్లో దాని ప్రదర్శన ఎలా ఉంటుందో చూడాలి.
