భారత రక్షణ రంగాన్ని కొత్త శిఖరాలవైపు తీసుకెళ్లే కీలకమైన పరిణామం ‘ధ్వని’ రూపంలో మలుపుతిరుగుతోంది. ఇప్పటికే ప్రపంచవ్యాప్తంగా సంచలనం రేపిన బ్రహ్మోస్ క్షిపణికి మించి శక్తిమంతమైన హైపర్‌సోనిక్ గ్లైడ్ వెహికల్‌ను (HGV) దేశీయంగా అభివృద్ధి చేస్తూ, ఈ ఏడాది చివరి నాటికి పూర్తిస్థాయి ప్రయోగాలకు సిద్ధమవుతోంది డిఫెన్స్ రిసర్చ్ అండ్ డెవలప్‌మెంట్ ఆర్గనైజేషన్ (DRDO).
‘ధ్వని’ అనే పేరుతో అభివృద్ధి చేస్తున్న ఈ గ్లైడ్ వెహికల్‌ గంటకు 7,000 కిలోమీటర్లకు పైగా వేగంతో ప్రయాణించే సామర్థ్యం కలిగి ఉంది. ఇది ధ్వని వేగానికి ఐదారు రెట్లు అధికం. ఈ క్షిపణి 1500 నుంచి 2000 కిలోమీటర్ల దూరంలోని లక్ష్యాలను అత్యంత కచ్చితత్వంతో ఛేదించగలదు. ఒకసారి గాల్లోకి ఎగిరిన తర్వాత, ఇది శత్రు స్థావరాలను నిమిషాల వ్యవధిలో నాశనం చేసే సామర్థ్యం కలిగి ఉంటుంది.
ఈ క్షిపణి టెక్నాలజీ యొక్క ప్రత్యేకత దాని వేగం మాత్రమే కాదు. మార్గ మధ్యంలో దిశను మార్చుకోగలదు, ఇది శత్రు దేశాల గగనతల రక్షణ వ్యవస్థలకు పెద్ద సవాలుగా మారుతుంది. రాడార్లకు కనిపించకుండా, మార్గాన్ని అంచనా వేయలేని విధంగా మారుస్తుండటం వల్ల దీనిని నిరోధించడం దాదాపు అసాధ్యంగా మారుతుంది.
‘ధ్వని’ గ్లైడ్ వెహికల్‌ని ప్రయోగించేందుకు ముందు రాకెట్ బూస్టర్‌ ఉపయోగించబడుతుంది. ఇది అత్యంత ఎత్తుకు వెళ్లిన తర్వాత, అక్కడి నుంచి విడిపోయి, సెమీ-బాలిస్టిక్ మార్గంలో గమ్యం వైపు హైపర్‌సోనిక్ వేగంతో దూసుకెళ్తుంది. ఇది ప్రత్యర్థుల రాడార్లకు చిక్కకుండా లక్ష్యాన్ని ఛేదించే అత్యాధునిక పద్ధతి.
ఇప్పటికే DRDO కీలక అంశాలైన ఎయిర్‌ఫ్రేమ్ డిజైన్‌, ఏరోడైనమిక్స్‌, థర్మల్ మేనేజ్‌మెంట్‌, స్క్రామ్‌జెట్ ఇంజిన్ పనితీరుపై విజయవంతమైన ప్రాథమిక పరీక్షలు జరిపింది. ఈ విజయాల నేపథ్యంలో, ఇప్పుడిదే ఆధారంగా పూర్తిస్థాయి ప్రయోగాలకు రంగం సిద్ధమవుతోంది.
ఈ ప్రయోగం విజయవంతమైతే, హైపర్‌సోనిక్ ఆయుధ టెక్నాలజీ కలిగిన అమెరికా, రష్యా, చైనా వంటి దేశాలతో సమానంగా భారత్ నిలబడి, రక్షణ రంగంలో గణనీయమైన అడుగులు వేయనుంది. ‘ధ్వని’ క్షిపణి దేశ భద్రతను కాపాడడమే కాక, శత్రుదేశాలకు భారత్ టెక్నాలజీ పరంగా ఎంత ముందుందో చాటే అస్త్రంగా మారనుంది.
ఈ క్షిపణి నిపుణుల అంచనాల ప్రకారం బ్రహ్మోస్ కంటే మరింత శక్తివంతమైనదిగా భావించబడుతోంది. దీనితో, భారత రక్షణ వ్యవస్థకు కొత్త శక్తిని అందించడానికి DRDO ఈ ప్రాజెక్ట్‌ మీద పూర్తి నిబద్ధతతో ముందుకెళ్తోంది.
