రైల్వేశాఖ సహాయ మంత్రి రవనీత్ సింగ్ బిట్టు చేసిన తాజా ఆరోపణలు దేశవ్యాప్తంగా చర్చనీయాంశమయ్యాయి. తాను ఖలిస్థానీల హత్య లక్ష్యంగా పన్నిన కుట్రలో ఉన్నానని వెల్లడించిన ఆయన, తీవ్ర భద్రతా ముప్పును ఎదుర్కొంటున్నానని తెలిపారు. ఖలిస్థానీ భావజాలానికి చెందిన వ్యక్తులు తనపై దాడికి కుట్ర పన్నుతున్నారని పేర్కొన్నారు.
అమృత్‌పాల్ సింగ్ నడిపిస్తున్న ‘వారిస్ పంజాబ్ దే’ సంస్థకు మద్దతు ఇచ్చే ఖలిస్థానీలు ఈ కుట్రకు పాల్పడుతున్నారని మంత్రి తెలిపారు. ఇటీవల సోషల్ మీడియాలో లీకైన కొన్ని స్క్రీన్ షాట్లు ఈ విషయాన్ని స్పష్టంగా వెల్లడించాయని ఆయన అన్నారు. ఈ హత్య కుట్ర విషయాన్ని కేంద్రానికి తెలిపినట్లు వెల్లడించారు.
పంజాబ్‌లో తాను ఒక్కరే కాకుండా మరికొంత మంది రాజకీయ నాయకులు ఖలిస్థానీయుల లక్ష్యంగా మారిన పరిస్థితి నెలకొంది. దేశ భద్రతకు ఇది పెద్ద ముప్పుగా మారే అవకాశముందని బిట్టు హెచ్చరించారు. ఖలిస్థానీ మద్దతుదారుల కక్షసాధన రాజకీయ నాయకుల ప్రాణాలపై విఘాతం కలిగించేలా ఉందని చెప్పారు.
జాతీయ భద్రతా చట్టం కింద అమృత్‌పాల్ సింగ్‌పై తీసుకున్న చర్యలపై ‘వారిస్ పంజాబ్ దే’ నేతలు ఆగ్రహంతో ఉన్నారని, కేంద్ర హోం మంత్రి అమిత్ షాపై కూడా వారు వ్యాఖ్యలు చేస్తుండటం ప్రమాదకర పరిణామమని ఆయన వ్యాఖ్యానించారు. కేంద్రం ఈ విషయాన్ని చాలా సీరియస్‌గా తీసుకుని విచారణ చేపడుతోంది.
