ప్రేమలో మునిగిన భార్య… పతికి మృత్యు ఫలితం
బుర్హాన్‌పూర్‌ జిల్లాలోని ఇండోర్-ఇచాపూర్ హైవే సమీపంలో ఉన్న ఐటీఐ కళాశాల వద్ద ఈ దారుణం చోటుచేసుకుంది. 25ఏళ్ల గోల్డెన్ పాండే అలియాస్ రాహుల్‌ను, అతని 17ఏళ్ల భార్య తన ప్రియుడితో కలిసి హత్యకు పాల్పడింది. రెస్టారెంట్‌లో భోజనం చేసిన తర్వాత ఇద్దరూ బైక్‌పై బయల్దేరగా, చెప్పు పడిపోయిందని చెప్పిన భార్య అతన్ని ఆపింది. అదే సమయంలో ప్రేమికుడు యువరాజ్, అతని స్నేహితులు రాహుల్‌ను పగిలిన బీరు సీసాలతో 36 సార్లు పొడిచారు.
వీడియో కాల్‌లో హత్యా దృశ్యం
ఈ దాడితో రాహుల్ అక్కడికక్కడే మృతి చెందాడు. హత్య అనంతరం భార్య తన భర్త మృతదేహాన్ని ప్రేమికుడైన యువరాజ్‌కు వీడియో కాల్‌లో చూపించింది. ఆపై మృతదేహాన్ని సమీపంలోని పొలంలో పడేసి నిందితులు అక్కడి నుంచి పరారయ్యారు. ఈ ఘటనను పోలీసులు ఆదివారం (ఏప్రిల్ 13) వెలికితీశారు. మృతదేహాన్ని గుర్తించిన కుటుంబ సభ్యులు, అతను చివరిసారి భార్యతో కలిసి బయటకు వెళ్లినట్లు చెప్పారు.
భార్య మిస్సింగ్…పోలీసులకు బలమైన అనుమానం
హత్య జరిగిన రోజు నుంచి భార్య కనిపించకపోవడంతో పోలీసులు అనుమానం వ్యక్తం చేశారు. అన్వేషణ ప్రారంభించి, నలుగురు నిందితులను అదుపులోకి తీసుకున్నారు. వారిలో మైనర్ భార్యతో పాటు ఆమె ప్రియుడు యువరాజ్, అతని ఇద్దరు స్నేహితులు ఉన్నారు. విచారణలో నిందితులు నేరాన్ని అంగీకరించడంతో పోలీసులు చకచకా కేసును ఛేదించారు.
ప్రేమకే ప్రాణాల తాకట్టు…ఘోర కుట్ర వెలుగు
ఈ ఘటన మానవత్వాన్ని హద్దులు దాటి వెళ్ళిన ఉదాహరణగా మారింది. నాలుగు నెలల క్రితం మాత్రమే పెళ్లి అయిన భార్య, భర్తను అంతలా ద్వేషించడానికి కారణాలపై పోలీసులు ఇంకా విచారణ చేస్తున్నారు. నిందితులపై హత్య, హత్యకు కుట్ర పన్నడం, ఆధారాలను నాశనం చేయడం వంటి అనేక సెక్షన్ల కింద కేసులు నమోదు చేశారు. వారి జీవితాలను శాశ్వతంగా కలుషితం చేసిన ప్రేమ, పాశవికత్వం సమాజాన్ని కదిలించేలా ఉంది.
