ఈ ఏడాది సంక్రాంతి సీజన్‌లో విడుదలైన ‘డాకు మహారాజ్’ సినిమా తాజాగా మరో విశేషంతో వార్తల్లో నిలిచింది. నందమూరి బాలకృష్ణ ప్రధాన పాత్రలో నటించిన ఈ చిత్రం, ఇరాక్‌కు చెందిన ఓ అరబిక్ పత్రికలో ప్రాధాన్యంగా కవర్‌ అయింది. ఈ విశేషాన్ని తెలుసుకున్న అభిమానులు సోషల్ మీడియాలో ఉత్సాహంగా స్పందిస్తున్నారు.
ఆ అరబిక్ పత్రిక కథనం ప్రకారం, డాకు మహారాజ్ సినిమాలో ఉపయోగించిన అత్యాధునిక సాంకేతికత, గ్రాఫిక్స్, యాక్షన్ సన్నివేశాలు అత్యుత్తమంగా ఉన్నాయంటూ ప్రశంసలు అందాయి. బాలకృష్ణ పోషించిన పాత్రను రాబిన్‌హుడ్‌ తరహాలో చిత్రీకరించారని, పేదల కోసం పోరాడే నాయకుడిగా అతని పాత్ర బలంగా నిలిచిందని కథనంలో వివరించారు.
తెలుగు సినిమా విషయంలో అరబిక్ మీడియా ఇలా స్పందించడం అరుదైన విషయం. దీంతో బాలయ్య అభిమానులు ఎంతో గర్వంగా ఈ వార్తను ట్విట్టర్ వేదికగా పంచుకుంటున్నారు. ఇరాక్ పత్రికలో వచ్చిన కథనానికి సంబంధించిన పేజీ స్క్రీన్‌షాట్‌లు వైరల్ అవుతున్నాయి. బాలకృష్ణ సినిమాకు విదేశీ గుర్తింపు లభించడం పట్ల హర్షాతిరేకాలు వ్యక్తం అవుతున్నాయి.
బాబీ దర్శకత్వం వహించిన ఈ చిత్రంలో ప్రజ్ఞా జైస్వాల్, శ్రద్ధా శ్రీనాథ్‌లు కథానాయికలుగా నటించారు. ఊర్వశీ రౌతేలా ప్రత్యేక గీతంలో ఆకట్టుకోగా, బాబీ డియోల్ ప్రతినాయకుడిగా నటించారు. థియేటర్లలో విజయం సాధించిన ఈ చిత్రం, నెట్‌ఫ్లిక్స్‌లోనూ ట్రెండింగ్‌లో కొనసాగుతోంది. ప్రస్తుతం నెట్‌ఫ్లిక్స్‌లో స్ట్రీమింగ్ అవుతూ ప్రేక్షకాదరణను పొందుతోంది.
