ఆంధ్రప్రదేశ్‌లో మద్యం ధరలు పెరిగే అవకాశముంది. రాష్ట్ర ప్రభుత్వం మద్యం దుకాణదారులకు చెల్లించే మార్జిన్‌ను పెంచేందుకు అంగీకరించినట్టు సమాచారం. మద్యం దుకాణ యజమానులు తమ మార్జిన్ చాలడం లేదని ఆందోళన వ్యక్తం చేయడంతో ప్రభుత్వం దీనిపై స్పందించినట్టు తెలుస్తోంది. నూతన విధానంలో మద్యం దుకాణాలను వేలం ద్వారా కేటాయించినప్పటికీ, యజమానులకు లభించే లాభాల్లో తక్కువ మార్జిన్ ఉండటంతో వారు ఆర్థికంగా కష్టాలు ఎదుర్కొంటున్నారని చెబుతున్నారు.
2024 అక్టోబర్ 16 నుంచి రాష్ట్రవ్యాప్తంగా మద్యం దుకాణాలను వేలం ద్వారా ప్రైవేట్ యజమానులకు కేటాయించారు. అయితే, విక్రయాలు అనుకున్న స్థాయిలో లేకపోవడంతో యజమానులు ఖర్చులు, వడ్డీలు చెల్లించలేకపోతున్నారని చెబుతున్నారు. దీంతో ప్రభుత్వం మార్జిన్‌ను 14.5 శాతం నుంచి 20 శాతం వరకు పెంచే అవకాశముందని సమాచారం. అయితే, అధికారికంగా ఎన్నికల సమయాన్ని దృష్టిలో ఉంచుకుని ఈ నిర్ణయాన్ని ప్రకటించకపోవచ్చని విశ్లేషకులు భావిస్తున్నారు.
ఎన్నికల ప్రచారంలో ప్రభుత్వం మద్యాన్ని తక్కువ ధరలకు అందిస్తామని హామీ ఇచ్చింది. నాణ్యమైన బ్రాండ్లను తక్కువ ధరకే విక్రయించేందుకు చర్యలు తీసుకుంది. అయితే, మార్జిన్ తక్కువగా ఉండటంతో యజమానులు ఆందోళన చెందుతున్నారు. వీరి సమస్యను పరిష్కరించేందుకు మార్జిన్‌ను పెంచాలని ఎక్సైజ్‌ శాఖ ప్రతిపాదనలు సిద్ధం చేసినట్టు సమాచారం. ఇదే కొనసాగితే మద్యం ధరలు భారీగా పెరిగే అవకాశముందని భావిస్తున్నారు.
మద్యం ధరల పెంపుపై అధికారిక ప్రకటన లేకపోయినా, ఎమ్మెల్సీ ఎన్నికల అనంతరం దీనిపై స్పష్టత వచ్చే అవకాశం ఉంది. ప్రస్తుతం చీప్ లిక్కర్ ధర యధాతథంగా ఉండగా, ఇతర మద్యం ధరలు పెరిగే అవకాశముందని తెలుస్తోంది. కనీసం ప్రతి క్వార్టర్‌పై 10 రూపాయల పెరుగుదల ఉండొచ్చని సమాచారం. మద్యం వ్యాపారులకు ఊరట కలిగించేలా మార్జిన్ పెంపు ఉండగా, వినియోగదారులకు మాత్రం మద్యం ఖరీదుగా మారే అవకాశం కనిపిస్తోంది.
