భారతదేశంలో తొలి ఆర్టిఫిషియల్ ఇంటెలిజెన్స్ (ఏఐ) యూనివర్సిటీ మహారాష్ట్రలో ఏర్పాటు కానుంది. ఈ ప్రతిష్ఠాత్మక ప్రాజెక్టును విజయవంతంగా అమలు చేయడానికి టాస్క్ ఫోర్స్ కమిటీ ఏర్పాటు చేసినట్టు రాష్ట్ర ఐటీశాఖ మంత్రి ఆశిష్ షేలర్ వెల్లడించారు. దేశంలో మౌలిక సదుపాయాలు, పరిశోధన అవకాశాలు పెంచే దిశగా ఇది కీలక అడుగుగా భావిస్తున్నారు.
ఈ కమిటీలో ఐఐటీ ముంబై, ఐఐఎం ముంబై డైరెక్టర్లు, గూగుల్ ఇండియా, మహీంద్రా గ్రూప్, ఎల్ అండ్ టీ వంటి దిగ్గజ సంస్థల ప్రతినిధులు సభ్యులుగా ఉన్నారు. ఆధునిక టెక్నాలజీపై పరిశోధన చేయడానికి ఈ యూనివర్సిటీ గొప్ప వేదిక కానుంది. విద్య, పరిశ్రమల అనుసంధానం ద్వారా నూతన ఆవిష్కరణలకు ఇది మార్గదర్శిగా నిలుస్తుంది.
ఏఐ రంగంలో భారతదేశాన్ని గ్లోబల్ లీడర్‌గా తీర్చిదిద్దేందుకు ఈ యూనివర్సిటీ కీలకంగా మారనుంది. విద్యార్థులు, పరిశోధకులకు ప్రాధాన్యతనిస్తూ అధునాతన ల్యాబ్‌లు, పరిశోధన సదుపాయాలు అందుబాటులోకి రానున్నాయి. ప్రభుత్వ, ప్రైవేట్ రంగ సంస్థల సహకారంతో అత్యాధునిక టెక్నాలజీలపై అధ్యయనం చేయనున్నారు.
మహారాష్ట్ర ప్రభుత్వ ఈ నిర్ణయం దేశంలోని ఇతర రాష్ట్రాలకు కూడా ప్రేరణగా మారనుంది. ఏఐ ఆధారిత పరిశోధనలతో భవిష్యత్‌కు సరైన మార్గాన్ని సృష్టించడమే లక్ష్యమని మంత్రి వెల్లడించారు. విద్య, పరిశ్రమలు కలిసికట్టుగా పనిచేస్తే దేశంలో అధునాతన సాంకేతికత అభివృద్ధికి ఇది పెద్ద దోహదం కానుంది.
