దక్షిణాఫ్రికా ‘ఏ’తో జరుగుతున్న అనధికారిక టెస్టు సిరీస్‌లో భారత్ ‘ఏ’ జట్టుకు సారథ్య బాధ్యతలు చేపట్టిన రిషబ్ పంత్ మరోసారి చర్చనీయాంశంగా మారాడు. గాయం నుంచి పూర్తిగా కోలుకున్న పంత్, బెంగళూరులోని సెంటర్ ఆఫ్ ఎక్సలెన్స్ మైదానంలో మొదలైన తొలి మ్యాచ్‌లో టాస్ గెలిచి బౌలింగ్ ఎంచుకున్నాడు. అయితే, మ్యాచ్ కంటే ఎక్కువ చర్చనీయాంశంగా మారింది అతడు ధరించిన జెర్సీ. పంత్ సాధారణంగా 17వ నెంబర్ జెర్సీతో బరిలోకి దిగుతాడు కానీ, ఈసారి మాత్రం 18వ నెంబర్ జెర్సీతో మైదానంలో అడుగు పెట్టాడు.
ఈ జెర్సీపై అభిమానుల దృష్టి పడటానికి కారణం – అది మాజీ కెప్టెన్ విరాట్ కోహ్లీకి చెందిన నెంబర్ కావడం. కోహ్లీ ఇటీవల టెస్టు ఫార్మాట్ నుంచి రిటైర్మెంట్ ప్రకటించిన సంగతి తెలిసిందే. దాంతో రిషబ్ పంత్, అందుబాటులో ఉన్న 18వ నెంబర్ జెర్సీని ధరించాడు. సోషల్ మీడియాలో ఇది పెద్ద చర్చగా మారింది. కొందరు అభిమానులు “కోహ్లీ లెగసీ కొనసాగించడానికి పంత్ సరైన వ్యక్తి” అంటుంటే, మరికొందరు “కోహ్లీ నెంబర్‌ను రిటైర్ చేయాల్సింది” అని వ్యాఖ్యానిస్తున్నారు.
గతంలో ముఖేశ్ కుమార్ కూడా భారత ‘ఏ’ జట్టు తరఫున ఆడినప్పుడు ఇదే నెంబర్ జెర్సీని ధరించాడు. ఇకపోతే బీసీసీఐ గతంలో సచిన్ టెండుల్కర్ (10), ఎంఎస్ ధోనీ (7) లాంటి దిగ్గజాల జెర్సీలను రిటైర్ చేసిన సందర్భాలు ఉన్నాయి. కోహ్లీ విషయంలో మాత్రం ఇంకా అధికారిక నిర్ణయం తీసుకోలేదు. టెస్టులకు గుడ్‌బై చెప్పినా, వన్డేలు, టీ20ల్లో కొనసాగుతున్నందున 18వ నెంబర్ అందుబాటులో ఉందని భావిస్తున్నారు. రిషబ్ పంత్ జెర్సీతో సోషల్ మీడియాలో #Pant18 మరియు #KohliLegacy అనే హ్యాష్‌ట్యాగ్లు ట్రెండ్ అవుతున్నాయి.
