యూరోపా దేశాల్లోని ప్రధాన విమానాశ్రయాలు ఇటీవల భారీ సైబర్ దాడులకు గురయ్యాయి. లండన్ హీత్రో, బెల్జియం బ్రసెల్స్, జర్మనీ బెర్లిన్ సహా అనేక యూరోపియన్ విమానాశ్రయాల్లో ఈ దాడులు చోటు చేసుకున్నాయి. దాంతో విమాన సర్వీసులు తీవ్ర అంతరాయానికి గురయ్యాయి, వేలాదిమంది ప్రయాణికులు ప్రయాణంలో ఇబ్బందులు ఎదుర్కొన్నారు.
విమానాశ్రయ అధికారులు చెబుతున్నట్లుగా, సైబర్ నేరగాళ్లు సర్వీస్ ప్రొవైడర్లను లక్ష్యంగా చేసుకోవడంతో చెక్-ఇన్, బోర్డింగ్, ఇతర సేవలు నిలిచిపోయాయి. బ్రసెల్స్ విమానాశ్రయంలో ఆటోమేటెడ్ చెక్-ఇన్, బోర్డింగ్ సర్వీసులు పనిచేయడం లేదు. సాంకేతిక బృందం సిస్టమ్‌ను సరిచేసేందుకు శ్రమిస్తోంది. ఇప్పటికే అక్కడ ఉన్న ప్రయాణికుల కోసం ప్రత్యేక ఏర్పాట్లు కూడా చేశారు.
బెర్లిన్ విమానాశ్రయ అధికారులు, యూరప్ అంతటా సిస్టమ్ ప్రొవైడర్‌లో సాంకేతిక సమస్య కారణంగా చెక్-ఇన్ వేగం తగ్గిందని, త్వరిత పరిష్కారం కోసం ప్రయత్నిస్తున్నట్లు తెలిపారు. పోలాండ్ డిజిటల్ వ్యవహారాల మంత్రి క్రిజ్‌టోఫ్ గావ్కోవ్స్కీ, యూరోపియన్ కార్యకలాపాలకు అంతరాయం ఉన్నప్పటికీ, విమానాశ్రయాల భద్రతకు ఎటువంటి ముప్పు సంకేతాలు లేవని వెల్లడించారు. ఫ్రాంక్‌ఫర్ట్, జ్యూరిచ్ విమానాశ్రయాలపై ఎలాంటి ప్రభావం లేదని అధికారికంగా ధృవీకరించారు.
ఇక భారత నేపథ్యానికీ ఇది సానుకూలం కాదు. కొన్ని రోజుల క్రితం పహల్గాం ఉగ్రదాడి తర్వాత, పాకిస్థాన్ సైబర్ దాడులకు దిగింది. భారత రక్షణ వైబ్‌సైట్లు, ఆర్మర్డ్ వెహికల్ నిగమ్ లిమిటెడ్ వెబ్‌సైట్, మనోహర్ పారికర్ ఇన్స్టిట్యూట్ ఆఫ్ డిఫెన్స్ స్టడీస్ అండ్ అనాలిసిస్ సంస్థలను లక్ష్యంగా చేసి, విలువైన సమాచారాన్ని సేకరించడానికి పాకిస్తానీ హ్యాకర్లు ప్రయత్నించారు. ప్రభుత్వ రంగ సంస్థలను ఆఫ్‌లైన్‌లో ఉంచి, సైబర్ భద్రతా నిపుణులు చురుకుగా పర్యవేక్షిస్తున్నారు.
ప్రస్తుత పరిస్థితి, యూరోపియన్ విమానాశ్రయాలు, భారత రక్షణ సంస్థల భద్రతలో సైబర్ సెక్యూరిటీ ప్రాధాన్యతను మరోసారి చూపిస్తోంది.
