మహారాష్ట్రలో గడిచిన మూడు రోజులుగా కురుస్తున్న కుండపోత వర్షాలు, భారీ వరదలు రాష్ట్రాన్ని అతలాకుతలంగా మార్చివేశాయి. ఈ ప్రకృతి విపత్తు కారణంగా మొత్తం 11 మంది ప్రాణాలు కోల్పోయారు మరియు 41,000 మందికి పైగా ప్రజలను సురక్షిత ప్రాంతాలకు తరలించారు. ముఖ్యంగా ముంబై, థాణె, మరఠ్వాడా ప్రాంతాల్లో జనజీవనం పూర్తిగా అస్తవ్యస్తంగా మారింది.
ఆగస్టు 27 నుంచి 29 వరకు జరిగిన వరద, వర్షాలు వివిధ ఘటనలకు కారణమయ్యాయి. శుక్రవారం నాందేడ్, తదితర ప్రాంతాల్లో ముగ్గురు వ్యక్తులు వరద నీటిలో కొట్టుకుపోయి మరణించారు. ఈ నెల 26న నాశిక్, యావత్మాల్, జాల్నా జిల్లాల్లో ఇళ్ల కూలిపోయి ఐదుగురు ప్రాణాలు కోల్పోయారు. 27న నాందేడ్, వార్ధా ప్రాంతాల్లో మరో ముగ్గురు మరణించారు.
సోలాపూర్, జాల్నా, ఛత్రపతి శంభాజీ నగర్, ధారాశివ్ జిల్లాల్లో వరద తీవ్రత ఎక్కువగా ఉన్నట్టు వెల్లడైంది. ఈ ప్రాంతాల్లోని ప్రజలను సురక్షిత ప్రదేశాలకు తరలించి తాత్కాలిక పునరావాస శిబిరాలు ఏర్పాటు చేశారు. సహాయక చర్యలు సక్రమంగా జరుగుతున్నాయి.
పాల్ఘర్ జిల్లాలోని తలసారిలో అత్యధికంగా 208 మిల్లీమీటర్ల వర్షపాతం నమోదు అయ్యింది. ముంబై మహానగరంలో కూడా భారీ వర్షం కారణంగా రవాణా వ్యవస్థ నిలిచిపోయింది. ఛత్రపతి శంభాజీ నగర్‌లో 120.8 మిల్లీమీటర్ల వర్షపాతం నమోదు కాగా, పలు ప్రాంతాలు జలదిగ్బంధంలో ఉండటంతో ప్రజలు తీవ్ర ఇబ్బందులు పడుతున్నారు.
ప్రజల సురక్షిత చర్యలకు అధికారులు పూర్ణ శ్రద్ధ చూపుతూ వరద ప్రభావిత ప్రాంతాల్లో సహాయక కార్యక్రమాలు ముమ్మరంగా కొనసాగిస్తున్నారు. భవిష్యత్తులో ఇలాంటి విపత్తుల నుండి ప్రాణాలు, ఆస్తులు రక్షించుకోవడానికి ముందస్తు చర్యలపై కూడా దృష్టి సారించాలని ప్రభుత్వాలు సూచిస్తున్నారు.
