తెలంగాణ రాజకీయాల్లో మరో సార్ధకమైన సందేశం ఇచ్చే ప్రయత్నం చేశారు బీఆర్ఎస్ వర్కింగ్ ప్రెసిడెంట్ కేటీఆర్ (కల్వకుంట్ల తారక రామారావు). ప్రజలతో మమేకం అవుతూ, వారి సమస్యలను నేరుగా తెలుసుకోవడం కోసం ఈసారి కేటీఆర్ ఆటోలో ప్రయాణించారు. మస్రత్ అలీ అనే ఆటో డ్రైవర్ వాహనంలో కేటీఆర్ తెలంగాణ భవన్‌కు చేరుకున్నారు. ఈ ఘటన రాజకీయ వర్గాల్లో చర్చనీయాంశమైంది.
ఆటోలో ప్రయాణించిన అనంతరం కేటీఆర్ మాట్లాడుతూ, “తెలంగాణ రాష్ట్రంలో ఆరు లక్షలకు పైగా ఆటో డ్రైవర్లు రోజూ కష్టపడి కుటుంబాలను పోషిస్తున్నారు. కానీ వారి పరిస్థితి చాలా దుర్భరంగా ఉంది,” అని పేర్కొన్నారు. తాను స్వయంగా ఆటోలో ప్రయాణించడం ద్వారా వారి ఇబ్బందులను దగ్గరగా తెలుసుకోవడం లక్ష్యమని చెప్పారు.
ఆసక్తికరంగా, ఇదే ఆటోలో గతంలో కాంగ్రెస్ అగ్రనేత రాహుల్ గాంధీ కూడా ప్రయాణించిన విషయం గుర్తుచేశారు. “అసెంబ్లీ ఎన్నికల సమయంలో రాహుల్ గాంధీ ఈ మస్రత్ అలీ ఆటోలోనే ప్రయాణించి, ఆటో డ్రైవర్లకు ఎన్నో హామీలు ఇచ్చారు. కానీ ఆ హామీలు ఏవీ నెరవేర్చలేదు,” అని కేటీఆర్ విమర్శించారు.
మస్రత్ అలీ గురించి మాట్లాడుతూ, “ఇప్పుడాయన రెండు ఆటోలను అమ్మేసి, కిరాయి ఆటో నడుపుతున్నారు. ఇది తెలంగాణలోని ఆటో డ్రైవర్ల నిజ పరిస్థితిని తెలియజేస్తోంది,” అని అన్నారు. రాష్ట్రంలో ఆత్మహత్య చేసుకున్న 161 మంది ఆటో డ్రైవర్ల కుటుంబాలకు రూ. 10 లక్షల చొప్పున పరిహారం ఇవ్వాలని ఆయన ప్రభుత్వాన్ని డిమాండ్ చేశారు.
కేటీఆర్ ప్రయాణిస్తున్న సమయంలో ప్రజలు, ఆటో డ్రైవర్లు ఆయనతో మాట్లాడేందుకు, సెల్ఫీలు దిగేందుకు పెద్ద ఎత్తున చేరుకున్నారు. డ్రైవర్లతో నేరుగా సంభాషిస్తూ, వారి సమస్యలను, డిమాండ్లను గమనించారు. ఆయన ఆటో ప్రయాణం సోషల్ మీడియాలో వైరల్ అవుతూ, నెటిజన్లు మద్దతు వ్యక్తం చేస్తున్నారు.
