ఛత్తీస్‌గఢ్ రాష్ట్రంలోని బిలాస్‌పూర్ జిల్లాలో ఘోర రైలు ప్రమాదం జరిగింది.లాల్‌ఖాదన్ సమీపంలోని హౌరా మార్గంలో ప్రయాణిస్తున్న ప్యాసింజర్ రైలు ఒక సరుకు రైలును ఢీకొట్టింది. ఈ ఢీ కారణంగా అనేక రైలు బోగీలు పట్టాలు తప్పి, సంఘటనా స్థలంలో తీవ్ర గందరగోళం నెలకొంది. ప్రయాణికులు భయాందోళనకు గురయ్యారు.
ప్రాథమిక సమాచారం ప్రకారం, ప్రమాదంలో అనేక మంది గాయపడ్డారని అనుమానం వ్యక్తం చేస్తున్నారు. అయితే గాయపడిన వారి సంఖ్యపై ఇంకా అధికారిక ప్రకటన వెలువడలేదు.
రైల్వే అధికారులు వెంటనే రక్షణ బృందాలు, వైద్య సిబ్బందిని సంఘటనా స్థలానికి పంపించారు. స్థానిక అధికారులు కూడా సహాయక చర్యల్లో పాల్గొన్నారు. ప్రమాదం కారణంగా బిలాస్‌పూర్–కట్ని మార్గంలో రైలు రాకపోకలు పూర్తిగా స్థగితమయ్యాయి. పలు రైళ్లు రద్దు కాగా,కొన్ని రైళ్లు దారి మళ్లించబడ్డాయి.
రద్దైన రైళ్లలో ప్రయాణించాల్సిన ప్రయాణికుల కోసం రైల్వే శాఖ ప్రత్యామ్నాయ ఏర్పాట్లు చేస్తున్నట్లు తెలిపింది. ప్రమాదంలో ఓవర్‌హెడ్ వైర్లు, సిగ్నల్ వ్యవస్థలు దెబ్బతిన్నాయని అధికారులు వెల్లడించారు. ఇవి పునరుద్ధరించడానికి కొంత సమయం పట్టవచ్చని చెప్పారు. ప్రమాదంపై రైల్వే శాఖ ఇప్పటికే దర్యాప్తు ప్రారంభించింది.
