రాజ్యసభలో జరిగిన ‘ఆపరేషన్ సిందూర్’పై చర్చ సందర్భంగా కాంగ్రెస్ సీనియర్ నేత, ప్రతిపక్ష నాయకుడు మల్లికార్జున ఖర్గే కేంద్ర ప్రభుత్వాన్ని తీవ్రంగా ప్రశ్నించారు. ఇటీవల జమ్మూకశ్మీర్‌లోని పహల్గాం వద్ద జరిగిన ఉగ్రదాడిపై కేంద్ర హోంమంత్రి అమిత్ షా బాధ్యత వహించాల్సిందిగా డిమాండ్ చేశారు. ఈ దాడిలో అమాయక ప్రజలు, భక్తులు ప్రాణాలు కోల్పోయిన విషాద ఘటనను ఖర్గే తీవ్రంగా తప్పుబట్టారు.
ఖర్గే మాట్లాడుతూ, కేంద్ర ప్రభుత్వం మోదీ నేతృత్వంలో గతంలో “దేశంలో తీవ్రవాద మౌలిక సదుపాయాలను పూర్తిగా నాశనం చేశాం” అని ప్రకటించిన విషయాన్ని గుర్తు చేశారు. అలాంటప్పుడు పహల్గాం దాడి ఎలా జరిగిందని ఆయన నిలదీశారు. ఇది భద్రతా విఫలం కాదా? కేంద్ర హోంమంత్రిత్వ శాఖ, ఇంటెలిజెన్స్ వ్యవస్థ పూర్తిగా అప్రమత్తంగా లేకపోతే ఇలాంటి దాడి ఎలా జరగగలదని ప్రశ్నించారు.
ఇక 3 రోజుల ముందు ప్రధాని నరేంద్ర మోదీ జమ్మూకశ్మీర్ పర్యటన రద్దు చేసుకున్నారన్న అంశాన్ని ప్రస్తావించిన ఖర్గే, ఈ నిర్ణయం ఎందుకు తీసుకున్నారో ఇప్పటి వరకు ప్రభుత్వం నుంచి సరైన సమాధానం రాలేదన్నారు. “నేను లేఖ రాశాను. లోక్‌సభలోనూ, రాజ్యసభలోనూ అడిగాను. కానీ ఇప్పటికీ నాకు జవాబు రాలేదు. ప్రధానికి ముందే సమాచారం ఉందా? అందుకే ఆయన పర్యటనను రద్దు చేసుకున్నారా?” అని శంకా వ్యక్తం చేశారు.
అంతేకాక, ప్రజలకు ప్రమాదం ఉంటే కేంద్ర హోంమంత్రి అమిత్ షా ముందుగా హెచ్చరించాల్సిన బాధ్యత ఉందని గుర్తుచేశారు. “పర్యాటకులు, భక్తులు అక్కడికి వెళ్లకూడదని హెచ్చరించాల్సింది మీ బాధ్యత కాదా? మీరు మీను మీరు కాపాడుకోవడమే తప్ప ప్రజల భద్రత మీకు ముఖ్యం కాదా?” అని ప్రశ్నించారు ఖర్గే. ప్రజల ప్రాణాలకు విలువ లేకపోతే ఇది ఎలా దేశభక్తి అవుతుందని తీవ్ర స్థాయిలో విమర్శలు గుప్పించారు.
అలాగే, ఈ దాడిపై ఎలాంటి సన్నాహాలు లేకుండా ప్రభుత్వ యంత్రాంగం స్పందించకపోవడం, ముందస్తు సమాచారాన్ని తక్కువగా తీసుకోవడం వల్లే ఇంత పెద్ద ప్రమాదం జరిగిందని ఖర్గే అన్నారు. ఇప్పటికైనా కేంద్రం బాధ్యతాయుతంగా స్పందించి ప్రజలకు సమాధానం ఇవ్వాలని, అమిత్ షా ఈ ఘటనపై ప్రత్యక్షంగా బాధ్యత తీసుకోవాల్సిన అవసరం ఉందని స్పష్టంచేశారు.
ఈ సందర్భంలో ఆయన మరో అంశాన్ని ప్రస్తావిస్తూ, తమ పార్టీ ఎప్పటికీ పాకిస్తాన్‌కు క్లీన్ చిట్ ఇవ్వలేదని స్పష్టం చేశారు. “మేము దేశానికి వ్యతిరేకంగా మాట్లాడం. కానీ తప్పు జరిగితే తప్పును ఎత్తిచూపడం మాకు కర్తవ్యం” అని ఖర్గే అన్నారు.
ఖర్గే వ్యాఖ్యలతో రాజ్యసభలో తీవ్ర చర్చ చెలరేగింది. అయితే కేంద్రం నుండి ఇప్పటికీ స్పష్టమైన స్పందన రాకపోవడంతో, ప్రతిపక్షం ఈ అంశంపై మరింత పోరాటం చేయాలని సంకల్పించినట్లు తెలుస్తోంది. పహల్గాం ఘటనపై సత్యం బయటకు రావాల్సిందేనని ఖర్గే అన్నారు.
