కేజీఎఫ్’ సినిమాతో ఒక్కసారిగా స్టార్‌డమ్ అందుకున్న కథానాయిక శ్రీనిధి శెట్టి, ఇప్పుడు టాలీవుడ్‌లో తన ప్రత్యేక గుర్తింపును తెచ్చుకుంటోంది. బ్లాక్‌బస్టర్ హిట్ చిత్రం తర్వాత ఆమెకు దక్షిణాదిలో మంచి ఫ్యాన్‌ ఫాలోయింగ్ ఏర్పడింది. చీరకట్టులోనూ, స్టైలిష్‌ లుక్‌లోనూ ప్రేక్షకులను ఆకట్టుకునే ఈ నటి, తెలుగులో కూడా తన సత్తా చాటేందుకు సిద్ధమవుతోంది.
కన్నడలో తనకు నచ్చిన పాత్రల కోసం ఓపికగా ఎదురుచూస్తూనే, శ్రీనిధి టాలీవుడ్‌, కోలీవుడ్‌ వైపు అడుగులు వేస్తోంది. ఇప్పటికే ఆమె ‘హిట్ 3’ మరియు ‘తెలుసుకదా’ చిత్రాలతో తెలుగు ప్రేక్షకుల ముందుకు వచ్చింది. ఇప్పుడు ఆమెకు మరో పెద్ద అవకాశమొచ్చింది. ప్రముఖ దర్శకుడు త్రివిక్రమ్ శ్రీనివాస్ దర్శకత్వంలో, వెంకటేశ్ దగుబాటి హీరోగా తెరకెక్కుతున్న చిత్రంలో ఆమె హీరోయిన్‌గా ఎంపికైంది.
మొదట త్రిషతో పాటు పలువురు సీనియర్ నాయికల పేర్లు పరిశీలించిన తర్వాత చివరికి త్రివిక్రమ్ శ్రీనిధి శెట్టిని ఫైనల్ చేశారని సమాచారం. ఇప్పటికే ఈ సినిమా షూటింగ్‌ ప్రారంభమైపోయింది. వచ్చే నెల మొదటి వారంలో శ్రీనిధి సెట్స్‌పైకి వెళ్ళనుందని తెలుస్తోంది.
వెంకటేశ్‌తో జోడీగా ఆమె బాగా సెట్ అవుతుందని అభిమానులు సోషల్ మీడియాలో కామెంట్లు చేస్తున్నారు. “శ్రీనిధి పొడవైన ఆకృతి, చీరలో కనిపించే అందం వెంకీకి పర్‌ఫెక్ట్‌గా సరిపోతుంది” అని నెటిజన్లు పేర్కొంటున్నారు. ఇక త్రివిక్రమ్ దర్శకత్వం, వెంకటేశ్ నటన, శ్రీనిధి అందం కలయికలో సినిమా హిట్ అవుతుందనే నమ్మకం ఫ్యాన్స్‌లో ఉంది.
‘కేజీఎఫ్’ తర్వాత ఇది శ్రీనిధి శెట్టి కెరీర్‌లో మరో కీలక మలుపుగా మారనుందని సినీ విశ్లేషకులు అంచనా వేస్తున్నారు. త్రివిక్రమ్ మాంత్రిక కలం, వెంకీ క్లాస్‌ టచ్‌, శ్రీనిధి గ్లామర్‌ మిళితమై ఈ సినిమా భారీ అంచనాలు రేకెత్తిస్తోంది. ఈ ప్రాజెక్ట్‌తో శ్రీనిధి టాలీవుడ్‌లో తన స్థాయిని మరింత పటిష్ఠం చేసుకునే అవకాశం ఉందని అభిమానులు భావిస్తున్నారు.
