ఆసియా కప్ 2025 ఫైనల్లో చిరకాల ప్రత్యర్థి పాకిస్థాన్‌పై టీమిండియా అద్భుత విజయం సాధించడంతో భారత అభిమానుల్లో ఉత్సాహం వెల్లివిరియింది. భారత్ గెలుపులో కీలకంగా నిలిచిన క్రీడాకారులను దేశమంతా ప్రశంసిస్తున్న వేళ, సీనియర్ స్పిన్నర్ రవిచంద్రన్ అశ్విన్ తనదైన శైలిలో వ్యాఖ్యలు చేస్తూ వార్తల్లో నిలిచాడు.
అశ్విన్ తన యూట్యూబ్ చానల్ ద్వారా ఆసియా కప్ ఫైనల్‌పై విశ్లేషణ చేస్తూ, పాకిస్థాన్ పేసర్ హరీస్ రవూఫ్పై వ్యంగ్యాస్త్రాలు సంధించాడు. “భారత జట్టు ఇంత ఈజీగా గెలవడానికి సహకరించిన రవూఫ్‌కు మనం కృతజ్ఞతలు చెప్పాలి. చాలా కష్టమైన మ్యాచ్‌ను ఆయన సులభం చేశారు,” అంటూ ఘాటు సెటైర్లు వేశాడు. రవూఫ్ తన బౌలింగ్‌లో కేవలం 3.4 ఓవర్లలోనే 50 పరుగులు ఇచ్చాడని గుర్తు చేశాడు.
ఫైనల్లో పాక్ జట్టు తొలుత బ్యాటింగ్ చేసి 146 పరుగులకే ఆలౌట్ కాగా, లక్ష్య ఛేదనలో భారత్ టాప్ ఆర్డర్ 20 పరుగులకే ముగియడంతో మ్యాచ్ ఒత్తిడిలోకి వెళ్లింది. అయితే ఆ సమయంలో క్రీజులోకి వచ్చిన యువ క్రికెటర్ తిలక్ వర్మ (53 బంతుల్లో 69 నాటౌట్) తన ప్రదర్శనతో మ్యాచ్‌ను టీమిండియాకు గెలిపించాడు.
తిలక్ ఆటపై అశ్విన్ ప్రత్యేకంగా మాట్లాడుతూ, “ఈ యువ ఆటగాడు ఒత్తిడిలో ఎంతో నిశ్చలంగా, పసందైన షాట్లు ఆడాడు. స్పిన్ బౌలింగ్‌ను శ్రద్ధగా చూసి, ఫుట్‌వర్క్‌తో టచ్‌లో బాగా ఆడాడు. స్వీప్ షాట్లు అద్భుతంగా ఎక్స్‌క్యూట్ చేశాడు. ఎక్కువగా బంతిని గాల్లోకి లేపకుండా ఆడి విజయం తేలిక చేశాడు,” అని కొనియాడాడు.
అంతేగాకుండా భారత స్పిన్ బౌలింగ్ యూనిట్‌పై కూడా అశ్విన్ ప్రశంసలు కురిపించాడు. “వరుణ్ చక్రవర్తితో పాటు కుల్‌దీప్ యాదవ్ బౌలింగ్ అద్భుతంగా చేశారు. పాక్ బ్యాటర్లు స్పిన్నర్లకు ఎలాంటి సమాధానం చెప్పలేకపోయారు. శ్రీలంక ఆటగాళ్లు మాత్రం స్పిన్నర్లను మెరుగ్గా ఎదుర్కొన్నారు. షాట్ల ఎంపిక కూడా మంచి ప్లానింగ్‌తో జరిగింది,” అని వివరించాడు.
ఈ విజయం భారత్‌కు ఆసియా కప్‌లో 9వ టైటిల్ను అందించింది. అశ్విన్ వ్యాఖ్యలు, వ్యంగ్య వ్యాఖ్యానాలు ప్రస్తుతం సోషల్ మీడియాలో వైరల్ అవుతున్నాయి. భారత్ విజయానికి ప్రధాన కారణాలుగా తిలక్ వర్మ హాఫ్ సెంచరీ, స్పిన్నర్ల అద్భుత బౌలింగ్, మరియు పాక్ బౌలర్ల విఫలత అని స్పష్టమవుతోంది. ముఖ్యంగా హరీస్ రవూఫ్ ప్రతికూల ప్రదర్శనపై అశ్విన్ చేసిన సెటైర్లు ఇప్పుడు అభిమానుల మధ్య హాట్ టాపిక్‌గా మారాయి.
